«Түркістан ер түріктің бесігі ғой» деп басталатын Мағжанның жыры бүгінде жиі еске түседі. Өйткені Түркістан облысының құрылуы тарихи әділдіктің салтанат құрғаны деп есептеймін.
Қазір маңдайға басқан киелі шаһар дербес облыстың ордалы орталығына айналды. Түркістан қаласы облыс орталығына айналуы үшін алда көптеген жұмыс күтіп тұр. Бұл ретте қандай іске болса да білек сыбанып, бел буа кірісуге дайын тұрған халық бар.
Осы орайда, өңірдің экономикалық, әлеуметтік, рухани дамуының жаңа формуласы керек екенін байқау қиын емес. Өз кезегінде алғашқы қадам үшін арнайы жоба да дайын. Иә, бұл Елбасының таяуда ғана жариялаған «5 әлеуметтік мәселе» деп аталатын үндеуі.
Бес бөлімнен тұратын үндеудің әр тармағында жаңа белесті бағындыруға бастайтын бағдарды айқын байқауға болады. Біздіңше, әуелгісі – баспана мәселесі. Бұл ретте халық тығыз қоныстанған өңірде «7-20-25» бағдарламасы өте көп көмек көрсетеді деп білемін. Бұдан басқа, Түркістан облысында білікті мамандар даярлайтын жоғары оқу орындары қалыптасқаны да өңірдің дамуға бет түзеген бағытына темірқазық болатынына сенімдімін.
Бұдан басқа, өңірде салықтың жеңілдеуі, несие алудың оңтайлануы ел игілігінің артуына септесетіні анық.
Осы орайда сарапшы пікіріне жүгініп, Елбасының үндеуі Түркістан өңіріне қалай әсер етеді деген сұраққа жауап іздеп көрдік. Осы ретте блиц сұрағымызға белсенді жауап қатқан сарапшылардың бірі әйгілі саясаттанушы Елдос Жұмағұлов мырза болды. Уақыттың тығыздығына байланысты Елдос Тəңірбергенұлымен арқаны кеңге салып әңгіме құра алмадық. Десе де, алты ауыз сөзімен өз көзқарасын жеткізген азаматтың пікірі төмендегідей:
– Жаңадан құрылған, халқы тығыз орналасқан Түркістан облысы үшін Президенттің əлеуметтік бастамаларының алатын орны ерекше.
Бұл өңірде Президент бастамаларының жүзеге асуы аса маңызды. Табысы төмен жұмысшылардың мүддесі үшін салықтың төмендеуі жəне қолжетімді баспана өте керек бастама. Биылғы жылдың өзінде Түркістан облысында 730 мың шаршы метр баспана беруге жоспарлануда. Сонымен қатар білім беру гранттары ұлғаюы оңтүстік жастарына жасалынып отырған тікелей қолдау деп есептеймін. Халқы еңбекқор өңірге шағын несиенің де көмегі зор.
Ендігі мəселе – осы бастамалардың тиянақты орындалуы. Тағы бір ескеретін нəрсе, 7-20-25 бағдарламасында əр өңірдің халқының төлем қабілеті ескерілуі керек деп есептеймін. Бұл ретте азаматтардың кіріс мөлшеріне өңірлік коэффициент енгізілуі маңызды, – деп сарапшы Елдос Жұмағұлов өз ойын ортаға салды.
