Халық қалаулылары жазғы демалыста ел аралады. Әсіресе, ауыл тұрғындарының ахуалын біліп, айтарын тыңдады деп хабарлайды «Қала мен Дала».
Мәжіліс депутаты, Ұлттық құрылтай және Парламенттегі «AMANAT» партиясы фракциясының мүшесі Еділ Жаңбыршин Маңғыстауға барған сапарының қорытындысы туралы желіде жазды.
«Елдің көңілі референдумға дейінгідей емес. Жабырқау… Күткен жаңалықтың көңілден шықпағаны көрініп тұр. Шарықтап кеткен баға, титықтатқан жұмыссыздық, теңіздің қасында отырып, ауызсуға жарымау, айта берсең проблема шаш етектен.
Құрылыс жұмыстарына қаржы жетіспейді, жобалық-сметалық құжаттар түгелге жуық корректировкадан өтуі керек. Оған да қаржы жетіспей жатырғанын айтады құрылысшылар. Арты не болмақ?
Мектептегі сағат қысқартудан босаған мұғалімдер мәселесі тағы бар.
Жанар-жағармай дефициті. Біз мұнай мен газдың үстінде отырған елміз, үш мұнай өңдеу зауытымыз бар. Бұл қалай сонда?!
Қант тапшылығы неше ай болды, әлі реттелген жоқ, реттелетін түрі де көрінбейді.
Осыларды жүйелі шешуге бағытталған жобалар да көрінбейді. Бұл біреуді кінәлау емес, халықтың айтып отырған –назы мен сыны. Ел қатты қиналып отыр. Жағдай «ескі Қазақстаннан да» жаман болып кетті деп айтып отырғандар бар.
Менің ойым айтады:
1. Ескі жүйеде жұмыс істеп қалған шенеуніктер, жаңа жағдайға бейімделе алмай, жаңаша жұмыс істей алмай отыр. Ескі «Жигули» қанша әдемілесең де «Тойота» бола алмайды. Қанша рет айттық, жаңа кадрлар керек деп. Бәрін жасайтын адам, 8 айда ештеңе жасай алмаған Үкімет, енді бірдеңе қатыра қояды дегенге өз басым сенбеймін. Ренжімесін жігіттер.
2. Әлі күнге дейін экономиканы «жаулап» алған олигархтар кетпеген. Сол баяғы «өркеш майды» сору жүріп жатыр. Бір схемадан, екінші схемаға ауысып. Әйтпесе күні кеше тым жақсы сатылып тұрған дизель отыны мен бензин неге жоқ? Сол баяғы тарифтер, сол баяғы «откаттар», сол баяғы жемқорлық, сол баяғы әуе билеттерінің қымбатшылығы және т.с.с.
3. Саботаж.
Ескі кадрлар мен экономикаға кіріп алған «паразиттер» Мемлекет басшысының халық алдында беделін түсіріп, тақтан тайдыруды көздейді.
Алдағы уақытта олар өздерінің қуаттары мен ресурстары күйреп, халықтың әл-ауқаты артатынын біледі. Шамалары келгенше қарсыласуда. Қарсылық барлық салада және деңгейде жүріп жатыр.
Не істеу керек?
Биліктің барлық тармағына жаңа, таза адамдарды әкелу қажет. Тек мемлекет мүддесін ойлайтын. Ондай азаматтар 19 миллион халық ішінен табылады.
Екінші. «Паразиттерді» құрту керек, әйтпесе қоғамда үлкен «эпидемия» болады.
Үшінші. Мұны тез жасау керек. Жаңа жылға дейін. Шыдамның да шегі бар екенін ұмытпаған жөн!», – дейді депутат
ТАҚЫРЫПҚА ТҰЗДЫҚ
ТОҚАЕВ НҰРШУАҚҚА ШОМЫЛҒАН САБОТАЖНИКТЕРДІ АЯМАЙДЫ
Белгілі журналист, «Қазақ әдебиеті» газетінің бас редакторы Дәурен Қуат Парламент Мәжілісінің депутаты Еділ Жаңбыршиннің мемлекет басшысының беделіне нұқсан келтіріп жатқан екі кадрлар мен экономикаға кіріп алған «паразиттер» жөніндегі ойларына қатысты пікір білдірді.
Ол Мәжіліс депутатының кешегі ойлары мен сөздерін ерлікке теңеп, ексі кадрлардың Тоқаевқа саоттаж жасап жатқанын, олардың түпкі ойлары президентті орыннан түсіру екеніне еш күмәнбайтынын айтты.
Сонымен бірге ол Тоқаевтың да саботажниктерге соққы бере алатынын, ол тек күш жігері мен кәсіби шеберлігін ұрымтал сәтте пайдалануға дайын отырғанын атап өтті.
“Мәңгі…(лік) Мәжілісіміздегі депутаттардың арасында Еділдей ер бар екен. Жаңбыршин. Сол Еділ батыр бір сөзді анық айтты. Саботаж. Нұршуаққа шомылған бұрынғының бәрі, рас, қаңтардан кейінгі Қазақстанға қарсылық жасап бағуда. Мүмкін болса, олар Жаңа Қазақстанды жарға итеріп жіберуден еш тайынбайды. Өкініштісі сол, олардың бәрін «қолынан жетектеп отырып» (Н. Н.) түрмеге тоғыту әзірге мүмкін болмай тұр. Ал, Мемлекет басшысы саботажшылардың ісіне сабырмен қарап отыр. «Өзгерсін, жаңа заманға бет бұрсын, елге адал қызмет жасасын» дейді. Олай болмайды екен, Қаскең саботажниктерді аямайды. Көресіздер!”, – деді ол.
Бұған дейін хабарланғандай, Мәжіліс депутаты әлеуметтік желідегі парақшасында көптің көңіліндегі проблемаларға тоқталып, оны шешудің бірнеше жолын ұсынды.
Ол ескі жүйеге үйреніп қалған шенеуніктер жаңа жағдайға бейімделе алмай жатқанын, әлі күнге дейін экономиканы «жаулап» алған олигархтар кетпегенін, сол баяғы «өркеш майды» сорып, тек бір схемадан екінші схемаға ауысқанын айтып, екі кадрлар мен экономикаға кіріп алған «паразиттердің» халық алдында президенттің беделін түсіріп отырғанын айтқан еді.
