Кең байтақ қазақ жерінде органикалық табиғи таза азық-түлік өнімдерін өндірудің мүмкіндігі мол. Осы ресурсты кеңінен пайдаланып, ел экономикасын өркендетуге бағыттаудың маңызы зор. Бұл үшін бірінші кезекте органикалық өнімдерді өндіріп, оларды нарыққа шығаруға мүмкіндік беретін заңнамалық базаны жетілдірудің маңызы зор. Осы аптада осы бағыттағы жұмыстарға нақты қадам жасалды. ҚР Парламенті Сенатында палата Спикері Мәулен Әшімбаевтың төрағалығымен өткен басқосуда органикалық өнімдерді өндіру және олардың айналымы мәселелеріне арналған заң жобаларын таныстыру рәсімі өтті. Осы ретте бұл заң жобасына Сенат депутаттары бастамашыл болғанын айта кетуіміз керек.
Өз кезегінде Мәулен Әшімбаев еліміздің «Қазақстан – 2050» Стратегиясында елімізді экологиялық таза өнімдер нарығында жаһандық деңгейге көтеру міндеті белгіленгенін еске алып, Мемлекет басшысы Қасым-Жомарт Тоқаевтың Жолдауында осы мәселеге айрықша назар аударылғанын алға тартты.
– Президентіміз Қасым-Жомарт Тоқаев халыққа арнаған Жолдауында еліміздің ауыл шаруашылығындағы әлеуеті және органикалық өнім өндіру мүмкіндігі толық пайдаланылмай отырғанын атап өтті. Қазіргі таңда органикалық өнім өндіру нарығында ұзақ мерзімді өсу тренді байқалады. Сондықтан бұл саланың даму мүмкіндігі өте жоғары деуге толық негіз бар», – деді Мәулен Әшімбаев.
Сенат Спикері өз сөзінде елімізде органикалық өнім өндіру саласы бойынша айтарлықтай жұмыс атқарылғанын айта келе, бұл бағытта өзекті түйткілдер де бар екенін тілге тиек етті. Оның ішінде заңнамалық реттеу мәселесінің маңызы жоғары. Сондықтан сенаторлар осы саладағы заңдарды жетілдіру үшін бірқатар заң жобаларына бастамашылдық жасады.
Соған сәйкес, «Органикалық өнім өндіру және оның айналымы туралы», «Қазақстан Республикасының кейбір заңнамалық актілеріне органикалық өнімдерді өндіру және олардың айналымы туралы өзгерістер мен толықтырулар енгізу туралы» және «Қазақстан Республикасының Әкімшілік құқықбұзушылық туралы кодексіне толықтырулар енгізу туралы» заң жобаларына жаңашылдықтар енгізу көзделіп отыр.
Жаңа нормалардың бәрі органикалық өнім өндірушілер үшін қолайлы жағдай жасауға және осындай өнімдерді тұтынушы азаматтардың сұраныстарын қанағаттандыруға арналған.
Атап айтқанда, мемлекетке өтпелі кезеңнің шығыстарын субсидиялау ұсынылады. Өйткені ауылшаруашылық тауарларын өндірушілер бірнеше жыл бойы өнім ала алмауы мүмкін. Соған сәйкес өтпелі кезеңге тап болып, бос қалған ауыл шаруашылығы жерлерінен пайда да көре алмайды.
Заң жобасын талқылау барысында сенатор Ақылбек Күрішбаев тағы бір жаңашылдыққа тоқталып өтті. Ол – органикалық өнімді міндетті сертификаттаудан бас тарту. Әлемдік тәжірибеге сәйкес, соңғы дайын өнім емес, тек органикалық өнімді өндіру үдерісі ғана сертификатталады. Мұндай шара өнім өндірудің өзіндік құнын төмендетеді және шаруаларды қосымша қаржылық жүктемеден босатуға мүмкіндік береді. Нәтижесінде, өнімді, әсіресе, ішкі нарықта қолжетімді бағамен өткізуге жол ашылады.
Заң жобаларын талқылауға Ауыл шаруашылығы министрі Ербол Қарашөкеев, аграрлық сектор мамандары, БҰҰ Азық-түлік және ауыл шаруашылық ұйымының Қазақстандағы өкілі, Қазақстанда органикалық өнім өндірушілер одағының, Ұлттық аграрлық ғылыми-білім орталығының, «Қазақстан-Германия агросаяси диалогы» жобасының өкілдері және тағы басқа осы саладағы сарапшылар қатысты.
Іс-шара соңында Сенат Төрағасы талқылау барысында айтылған пікірлер мен ұсыныстар алдағы уақытта ескерілетінін және заң жобаларын жыл соңына дейін Парламент қарауына енгізу қажет екенін айтты.
